गुँपुन्हि तिथिकथं गुंलाथ्व पुन्हिकुन्हु ला: । थ्व नख: नेवाःतय्गु तःजिगु नखः खः । थ्व दिंकुन्हु सुथं न्हापां दना: नी याना: ब्रम्हुयात निसला: बिइगु नं गनंगनं चलन दु । अथेहे सुचुकुचु यानाः नी याना: गुता बिब:या क्वाति दाय्का:, छुचुंमरि, घासा दय्का: सकतां नसाः वाउँगु ब्वताय् ब्यांचाब्व तयाः अनलि स्वांसिन्ह: तयाः जाकिं पुजा यानाः छाय्गु याइ ।
थथे यानाः थःगु छेँया पिखालखु, मूल्वखा, द्यःकुथि, स्वाहाने, लँपुइ, क्वथाया ल्वखापत्तिकं तइ । अथेहे बुँइ नं तय्गु याइ । न्हापांनिसें हे नेवाःतय्गु मू लजगाः धयागु हे बुँज्या खः । बुँज्या हे थःगु जिविका न्ह्याकावयाच्वंगु खः ।
बुँज्या याइपिं बुँज्यामितय्सं थःगु बालिया सुसाकुसा याइम्ह धकाः बुँइ वनाः ब्यांयात नकेगु यानातःगु खः । अथेहे ब्यांचां मनूतय्त गथांमुगःथेंजा:म्ह दैत्यपाखें सुरक्षित या:गु धयागु किम्बदन्तिकथं नं ब्यांचाया दिं धकाः थुगु दिंकुन्हु ब्यांब्व तइ धयागु धापू दु ।
स्वास्थ्यया कथं स्वय्गु खःसा हाकनं गुता बिब: सुस्वास्थ्य जुइगु निंतिं, थाकुक ज्या यानाः न्य:गु म्हयात हाकनं ताकत बीगु कथं प्राेटीनया मात्रा भाेजनय् तयाःतःगु खनेदु सा अथेहे थुकिइ चिकं क्वय्का: ह्वाइगु इमु व छताजि वाउँगु घाँय्थेंजा:गु वाउँचां (ललिचां) पाचन प्रणालीयात ग्वाहालि याइगु व राेगप्रतिराेधात्मक शक्ति बःलाकाः बीइगु तत्व दुगु खनेदु ।