चिल्लागा चःर्हेय्कुन्हु नेपाःगालय् हनीगु छगू बिस्कं पह:या नख: पाहांचःर्हेय् ख: । थुगु चःर्हेय्यात पिशाच चःर्हेय् नं धाः । पिशाचया अर्थ दीप आदि फोहरया जःखः च्वनीपिं खः । थुगु पिशाच वर्गय् दथुइ सुलाः लुकुंबियाच्वंम्ह महाद्यःयात पार्वतीं माय्के छ्व:बलय् ल्वीकेफया: लय्ताया: बहनी लुकुमाद्यःयात म्वहनी सिन्ह: तया: पुज्याना: प्रसाद वा भ्वय् नय्गु यानात:गु खः । थुगु दिंकुन्हु महाद्यः काल भैरवया रुप कया: च्वनेगु जुया: थुम्ह लुकुमाद्यःयात नेवाःतय्सं पाछाइमाया लुँबुँ, लैंमाया वहःबुँ, वाउँलाभा, समय् व ला दुगु भ्वय्ब्व छाया: पुजा याइ । अथेहे पार्वतीया स्वरुप देवीपिनिगु नं थीथी थासय् जात्रा न्याय्की गथेकि येँय् श्वेतकालीया गण प्याखं, भद्रकाली व कङ्ग अजिमाया जात्रा, यलय् बालकुमारी जात्रा ।
च्वय् न्ह्यथनाकथं जात्रा व संस्कार नापनापं थुगु नख: रोगब्याधीनाप नं स्वापू दुगु खनेदु । चिकुला हिला: ताल्ला वैगु, मौसम हिलीगु इलय् मनूतय्गु स्वास्थ्यय् तप्यंक असर ज्वीगु अप्व: याना ह्याउँ मस्त, बचाधिक:पिं मस्तय्त ल्वचं थीगु सम्भावना दुगुलिं थज्या:गु ल्वचं मकय्मा धका: लुकुमहाद्य:या प्रसादकथं मल:जा नकेगु चलन दु । मल:जा नलकि झाराबान्ता महामारी थीफैमखु धैगु जन विश्वास दु । पाहांचःर्हेय्या कन्हय्कुन्हु यँय्, यलय् सलया: (घोडेजात्रा) न्याय्की । थुगु दिनय् यल बालकुमारीइ का:म्ह (अय्ला:थ्वं का:म्ह) सल व येँय् तिंख्यलय् त:जीक सल ब्वाकी ।